Komisioneri Shtetëror i Zgjedhjeve shqyrtoi administrativisht denoncimet nr. 130, nr. 134 dhe nr. 135, të Koalicionit për Reforma, Integrim dhe Institucione të Konsoliduara, për mosmarrjen dhe mospublikimin e vendimeve të kryetarëve të bashkive për vendet e afishimit të materialeve propagandistike për fushatën zgjedhore. U vendos tërheqja e vëmendjes kryetarëve të bashkive, të cilët nuk kanë përmbushur detyrat e lëna nga Kodi Zgjedhor dhe aktet e KQZ-së në fuqi.

U shqyrtuan edhe denoncimet me nr. 140, nr. 142, të KRIIK, lidhur me organizimin e koncerteve/shfaqjeve kulturore argëtuese përgjatë ose në lidhje me turbimet elektorale nga subjektet zgjedhore “Partia Socialiste” dhe Koalicioni “PD-ASHM”. U vendos përfundimi i hetimit administratrativ dhe shpallja e vendimeve në seancën e radhës.

Në lidhje me kërkesën e Koalicionit “PD-ASHM”, për mbylljen e zyrave të subjektit zgjedhor “Partia Socialiste e Shqipërisë”, shqyrtimi u mbyll pasi nga verifikimet e monitoruesit të fushatës rezulton se zyra zgjedhore është mbyllur.

Shqyrtimi i denoncimit nr. 143 për hapje të zyrës elektorale në kundërshtim me ligjin nga subjekti zgjedhor Koalicioni “PD-ASHM” në Laprakë, Tiranë do të vijojë në seancën e radhës pasi subjekti zgjedhor kërkoi të njihet me dokumentacionin përkatës.

Sa i përket kërkesës për mbylljen e zyrave zgjedhore të subjektit zgjedhor Koalicioni “PD-ASHM” në disa bashki, të cilat janë raportuar nga monitoruesit si të hapura në kundërshtim me udhëzimin nr. 6, datë 23.3.2021, të Komisionerit Shtetëror të Zgjedhjeve”, shqyrtimi do të vijojë në seancën e radhës.

KSHZ vlerësoi raportin e Strukturës së Posaçme për periudhën 21 – 28 Prill 2025. Shqyrtimi do të vijojë pas administrimit të argumenteve të palëve.

Bazuar në denoncimet nr. 90 ID, nr. 92 ID, nr. 95 ID, nr. 97 ID, nr. 102 ID, nr. 107 ID, nr. 124 ID, nr. 127 ID, nr. 128 ID, Komisioneri vendosi vijimin e hetimit administrativ ndaj:

1. Kryetarit dhe Sekretarit të Këshillit të bashkive Fier, Durrës,
2. Kryetarëve të bashkive Poliçan, Kamëz, Kuçovë;
3. Kryetarit të Këshillit të Qarkut Durrës;
4. Ministrit të Brendshëm;
5. Drejtorëve të Shkollave 9-vjeçare “Zylyftar Veleshnja”Velmish dhe “Rramen Dashi”, Arapaj në Fier.

Gjatë shqyrtimin administrativ të kërkesës, së subjekti zgjedhor Koalicioni “PD-ASHM”, për ndërprerjen e menjëhershme të transmetimit të spotit/reklamës të subjektit zgjedhor “Partia Socialiste e Shqipërisë”, lindi nevoja për të administruar prova nga e OSHMA-ve në lidhje me vazhdimin e transmetimit të spotit.

Në seancën e radhës do të shpallet vendimi për denoncimet me nr. 81 ID, nr. 82 ID, nr. 83 ID, nr. 84 ID, nr. 85 ID, nr. 88 ID, nr. 53 ID, nr. 59 ID, nr. 70 ID, nr. 78 ID, nr. 80 ID, nr. 87 ID, nr. 91 ID, nr. 100 ID, nr. 103 ID, nr. 106 ID, nr. 108 ID.

Në seancën e radhës do të shpallet edhe vendimi për gjetjet e raportit të Autoritetit të Medias Audiovizive për pasqyrimin e fushatës zgjedhore nga OSHMA-të për periudhën 17 - 23 prill 2025.

Në seancën e sotme u dha autorizimi për ndryshimin e vendndodhjes së 8 qendrave të votimit në bashkitë Kamëz dhe Cërrik.