KSHZ Celibashi vlerësoi raportet e monitoruesve për periudhën e monitorimit 6 prill – 12 prill 2025.

Gjatë kësaj periudhe janë dorëzuar 20 raporte shkeljesh nga monitoruesit e fushatës për bashkitë Tiranë, Kamëz, Peqin, Kukës, Lushnjë, Gjirokastër, Shijak, Korçë, për materiale propagandistike të vendosura pa shënimin shënimin “Prodhuar nën përgjegjësinë ligjore të .... (vijon me emrin e subjektit zgjedhor), në kundërshtim me nenin 79, pika 3 e Kodit Zgjedhor.

Komisioneri vendosi t’u japë 24 orë afat subjekteve zgjedhore për vendosjen e shënimit përkatës, dhe në rast të mos kryerjes së këtij detyrimi nga ana e subjekteve, vendosi urdhërimin e Policisë Bashkiake për heqjen e materialeve propagandistike.

Në seancën e sotme u vlerësua dhe raporti mbi veprimtaritë publike për periudhën 7 prill – 12 prill 2025. Në përfundim të shqyrtimit, KSHZ vendosi fillimin e shqyrtimit administrativ ndaj:

1. Agjencisë Shtetërore për Mbështetjen dhe Zhvillimin e Startup-eve;
2. Drejtorisë Rajonale të Trashëgimisë Kulturore Gjirokastër;
3. Bashkisë Lezhë.

U miratua një ndryshim në vendimin nr.351/2025, të Komisionerit Shtetëror të Zgjedhjeve “Për caktimin e vendeve të numërimit të votave për zgjedhjet e datës 11 maj 2025”. Ndryshimi konsistoi në zëvëndësimin e palestrës së shkollës “Hasan Prishtina” me palestrën e shkollës “Bajram Curri” si VNV në KZAZ-në nr.35.

Gjithashtu, u miratua urdhëri “Për rendin dhe sigurinë në objektet ku janë vendosur qendrat e votimit, si dhe përreth tyre, për zgjedhjet për Kuvend të datës 11 maj 2025.”

Urdhëri i miratuar parashikon që çdo KZAZ, me vendim të posaçëm, cakton si Koordinatorë të Sigurisë dy anëtarë të KQV për çdo vendndodhje QV-je, në përputhje me udhëzimet e miratuara nga KQZ, që janë propozuar një nga partia kryesore e shumicës parlamentare dhe tjetri nga partia kryesore e opozitës parlamentare.

KZAZ-ja harton dhe i dërgon KQZ-së dhe Policisë së Shtetit listën emërore të Koordinatorëve të Sigurisë.

Koordinatorët do të monitorojnë vazhdimisht mjediset e jashtme të QV-së, përfshirë oborret, hyrjet dhe perimetrin 150 metra.

Urdhëri i miratuar ditën e sotme adreson shqetësimet e ngritura nga OSBE-ODIHR, organizatat e shoqërisë civile dhe medias në zgjedhjet e kaluara, për praninë e personave të paautorizuar pranë qendrave të votimit në ditën e zgjedhjeve.