Sot, Komisioneri Shtetëror i Zgjedhjeve në seancë publike plotësoi vakancat e krijuara në pesë këshilla bashkiak:

Vakancat u plotësuan në:

1. Këshillin e Bashkisë Tiranë, me kandidatin nga lista shumemërore e Koalicionit “Bashkë Fitojmë”, z. Fatjon Bathorja;
2. Këshillin e Bashkisë Dibër, me kandidatin nga lista shumemërore e “Partisë Socialiste të Shqipërisë”, zj. Aida Murrja;
3. Këshillin e Bashkisë Vorë, me kandidatin nga lista shumemërore e Partisë “Fryma e Re Demokratike”, zj. Lavdurije Shahini;
4. Këshillin e Bashkisë Belsh, me kandidatin nga lista shumemërore e “Partisë Socialiste të Shqipërisë”, z. Avni Shtylla;
5. Këshillin e Bashkisë Rrogozhinë me kandidatin nga lista shumemërore e “Partisë Republikane Shqiptare”, zj. Dhurata Meka.

U shqyrtua rezultati i verifikimit të Prokurorit të Përgjithshëm për subjektin vetëdeklarues z. Euglen Gjini, kandidat për deputet, i propozuar nga subjekti zgjedhor Koalicioni “Nisma Shqipëria Bëhet-Adriatik Lapaj”, Qarku Fier, për zgjedhjet për Kuvend të datës 11 maj 2025.

Komisioneri vendosi deklarimin e procedurës administrative të përfunduar dhe pa vendim përfundimtar për z. Gjini, pasi vlerësohet se ka humbur objekti dhe qëllimi i procedurës administrative të filluar përpara ditës së zgjedhjeve.

U shqyrtua gjithashtu rezultati i verifikimit të Prokurorit të Përgjithshëm për subjektin vetëdeklarues z. Ilir Mollaj, kandidat për anëtar në Këshillin e Bashkisë Mirditë, i propozuar nga subjekti zgjedhor “Partia Lëvizja e Legalitetit”, për zgjedhjet për organet e qeverisjes vendore, të datës 14 maj 2023.

Komisioneri vendosi deklarimin e procedurës administrative të përfunduar dhe pa vendim përfundimtar për z. Mollaj, pasi vlerësohet se ka humbur objekti dhe qëllimi i procedurës administrative të filluar përpara ditës së zgjedhjeve.