Komisioni Qendror i Zgjedhjeve nisi sot analizën mbi “Trajnimet e administratës zgjedhore në terren – sfida dhe zgjidhjet
praktike: Dialog me trajnerët”, organizuar me mbështetjen e Prezencës së OSBE dhe në bashkëpunim me Zyrën e Këshillit të Evropës në vend.

Analiza dy ditore me trajnerët e certifikuar ka si qëllim kryesor vlerësimin e metodologjisë aktuale të trajnimit dhe materialeve të përdorura mbi bazën sfidave kryesore të hasura dhe identifikuara gjatë trajnimeve për zgjedhjet e 11 majit 2025 dhe vëzhgimeve praktike të trajnerëve mbi përgatitjen e administratës zgjedhore.

Përmes një dialogu të drejtpërdrejtë me trajnerët u trajtuan problematikat e metodologjisë trajnuese, nevojat për përmirësime si dhe efektiviteti i trajnimeve të administratës zgjedhore.

Në raportin përfundimtar të OSBE-ODIHR vlerësohet se trajnerët e KQZ-së gjatë trajnimeve përdorën metodologji të ndryshme trajnimi, ndaj KQZ po punon për zhvillimin e një kurrikule të standardizuar trajnimi bazuar në praktikat më të mira.

Në përfundim të këtij aktiviteti, KQZ do të hartojë udhëzime për përmirësim dhe standardizim të kurrikulës, metodologjisë së trajnimeve, planifikim më të mirë, me qëllim rritjen e profesionalizmit, standardizimit dhe integritetit të administratës zgjedhore.

Gjithashtu, ky aktivitet shërben edhe për komunikimin dhe njohjen e trajnerëve me njëri-tjetrin duke krijuar edhe bazat për krijimin e rrjeteve të trajnerëve lokalë