Sot u zhvillua Konferenca Kombëtare mbi “Rolin dhe kontributin e shoqërisë civile në proceset zgjedhore”, organizuar në bashkëpunim me Qendrën Burimore Kombëtare Shqiptare të Trajnimit dhe Asistencës Teknike dhe Institutin për Studime Publike dhe Ligjore.

Konferenca kishte si qëllim diskutimin mbi rëndësinë e rolit që shoqëria civile luan në proceset zgjedhore, përmes monitorimit të zgjedhjeve dhe promovimit të parimeve të zgjedhjeve të lira dhe të ndershme, me synim rritjen e standardeve demokratike dhe forcimin e integritetit zgjedhor në vend.

Gjatë diskutimeve u trajtuan çështje me rëndësi për proceset zgjedhore, si:

• edukimi dhe ndërgjegjësimi i votuesve;
• fuqizimi, përfshirja dhe pjesëmarrja në zgjedhje e grupeve të margjinalizuara;
• financimi i partive politike;
• monitorimi i proceseve elektorale;
• ndërtimi i besimit të publikut te zgjedhjet;
• problematikat në legjislacionin dhe politikat zgjedhore.

Konferenca mblodhi së bashku përfaqësues të organizatave të shoqërisë civile, ekspertë të zgjedhjeve, partnerë ndërkombëtarë, si dhe anëtarë të Komisionit të Posaçëm Parlamentar për Realizimin e Reformës Zgjedhore.

Aktiviteti u zhvillua në kuadër të projektit “Pjesëmarrja e OShC-ve në proceset zgjedhore për një demokraci më të fortë dhe përshpejtimin e integrimit në BE”, financuar nga Bashkimi Evropian.

KQZ e konsideron angazhimin e shoqërisë civile një shtyllë thelbësore për garantimin e transparencës, integritetit dhe besueshmërisë së proceseve zgjedhore në Shqipëri.